Tropik nan Saint-Raphael, gwo koze.

M pa nèg ki soti fasil, fwa sa a m pat ka pa la paske m pat ka rate okazyon sa a. Konbinezon an te twò byen fèt. Pase yon wikenn nan Cap-Haitien sete yon gwo koze. M te pare’m pou’m danse Tropik nan Saint-Raphael. M te panse fèt la tap bèl men mwen pat konnnen si’m tap fè eksperyans sa a ak Djazz la.

4 trè boul m te gentan rive nan Tropicana Night Club. Se lè sa a yo te bay mizisyen ki nan zòn nan pou yo rive . 30 minit apre nou te derape e bis djazz la te pase pran chak grenn mizisyen devan lakay yo e yo te deja ap tann. 5h45 tout moun la e nou nan wout.

Anndan bis la gen you anbyans rèd , Jimmy Papouloute, Calou yon bò ap bay blag, Boss Boubout ap kreye animasyion dèyè a . Wouyy! m nan bòl grès mwen . Apre Milot, nou pral koumanse pran sekous  paske wout la pa bon menm e lap konsa jiskaske nou rive Saint-Raphael. M te kontan wè peyizan nou yo sou wout la, sa kap fè bèt tankou kabrit bef manje. Le nap pase Dondon m te wè anpil pye bwa , ou santi se yon kote ki fè fre anpil.

Vè 7h45 yo konsa djazzz la rive nan vil Saint-Raphael, wi manman ou santi fèt la pral bèl ak kantite moun nou wè depi antre vil la jiska devan lokal kote djazz la pral jwe a. Enstriman djazz la te gentan enstale , m pa ka di se yon bèl Night club men podium nan ka kenbe djazz la . Ou ta di se yon teren vid paske pa gen chèz, pa gen tab, men li byen bare.

10h20 Mayestwo TiBlan bay siyal ak Saks li e Djazz la lage. Soti nan Nwè-l numewo 1 , pase pran Angelik, Deside w, Les gens Du Nord, Veye priye, Pou ki sa, Vye pwochen, ect e pou bal la fini ak Kenbe Diyite w, nou ka di moun Saint Raphael jwenn pou jis pri lòn magazen. Djazz la frape ak tout pisans li e tout moun byen danse. Tropicana montre tout bon vre pa gen chanpèt kelkeswa kote a san li. Malgre ke se te yon eksepsyon paske vakans djazz la pot ko fini.

Lavi mizisyen sitou an Ayiti pa bagay ki fasil. Malgre ke Tropicana gen yon bis ki trè konfòtab e ki ka rive tout kote, nan eta wout nou yo ye a mete plis fatig lakay mizisyen nou yo. Map raple tout moun ke Tropicana se djazz ki jwe tout kote nan kelkeswa kwen an Ayiti depi machinn ka rive. bal Sen Rafayèl la sete 120e bal yo pou ane a.

Panse a yon mizisyen ki fè 5 nwit you’n dèyè lot ap jwe bal, kouri machinn nan yon ekip wout ki chaje ak twou, riske lavi yo pou yo pote plezi bay de milye de moun e ki toujou rive a lè. Fatig devan dèyè. Tonè krisboulout mwen , mizisyen Tropicana se yo ki Ewo ke yo ye.

Tropicana d’Haiti nan Saint-Raphael samdi 25 Oktòb sete yon gwo bal, yon bèl bal. M pa ka tan pou’m redanse djazz la anko, djazz pa’m.

GT

Leave a Reply

Your email address will not be published. Required fields are marked *