Kenbe sa a frè m

par admin
39 vues

Kite madichon defoule kòl
Jodi a se jou pa l pou l kata
Sou bout tè prenn fè pa a
Gen lè ki pa pou kòsmòbè
Depi Lisifè monte konplo san koutya
Ak pwofèt kap di glwaradye
Tout vivan ki ret yon ti souf
Deja sispèk kote nou gad
Depi yo te di w se milèt
Ki akouche libète sa a
Fò w ta imajine jwèt la deregle
Ayiti tounen tè nou mele
Pèp vanyan tounen kòkòb
Pou senkòb lespwa yo pliye
Yo tonbe nan di beniswa
Sou yon vèvè ki tou sakre
Chwal malentespri vlope n
Menm Letènèl rete bouch be

Tout bra kwaze ap gad galon gaz
Kap gaz kole nan yon zile dezòlban
Yon savann dezole k trepase
Yon zonbi pratrinè souf kout
Yon kè bloke k ap respire dyòl louvri
Yon kiskeya depatya santi kri
De moso ranyon yon rigòl san
De pwa de mezi nan yon galon
Bò risit la se tonton
Bò lòt bò a se palmis
Se pa palmis libète pa m nan
Mwen ri yon leta
Yon leta k jwenn byenèt li nan souse
Yon leta vanpi, yon leta santò
Mwen ri yon kaptenn k ap ri
Nan tèt yon titanik k ap pran dlo
kadav ak vivan sou menm platin
Lavi ekri ak lèt lanmò
Chak silab se yon son bal
Chak vivan se yon mò pwofitè
K ap pran wilib sou kòbya lavi
kote n gad nou pa konnen
Sak ta di se la a n ta tonbe
Sak ta di se nan yon vaz kolboso
Nou ta rive bwè kafe douvanjou
Moun nou vole kite n
Ti moun piti ri leta
K ap fè jwèt manje tè
Sou tab yon repiblik
Ki yon jou te yon zile majik
M pap di w ale anpè, la patri
Se vre souf ou koupe doubout
Menm sèten nanm ou poko pati

Alande Paul

Vous pourriez aussi aimer

Laisser un commentaire