Sa fè lontan

par admin
12 vues

Peyi a tounen yon mach pye nan pla men lannwit
Powèm nan tanmen chache souf nou nan silans leta
Sa fè lontan

Sa fè lontan
Depi lavi al fè wout li
Dlo je nou fè yon sèl
Pou n lave sèkèy
N ap kole pyese solèy
Fouye twou antere zetwal
Pentire lanmè
Mete kouwòn sou tèt simityè

Sa fè lontan
Depi n ap pote nan men gòch yon lanp Ki tenyen
Vil yo plenn
Tan an chifonnen
Se van k ap pote n ale

Sa fè lontan
N ap sable pousyè ak san inosan
Vil yo kase kòd
Lavi ale ti gout pa ti gout
Lespwa pouri nan pay bagas

Sa fè lontan
Nou pote madichon pou chen fou
Nou kreve lanmou
Nou wont viv
Lanmò pran grad sou nou
Alo vouzan pèp

Mouche Tenten

Vous pourriez aussi aimer

Laisser un commentaire